…… (( بالهداوة يا صاحبي )) … .
بقلم د/ عمر عبد الجواد
بالهداوة يا صاحبي بالهداوة
لما تعاتبني و اعاتبك بالهداوة
إهدي يا صاحبي حبة
دا العتاب هدية أحبه
و خد آخر كلامي
وأحسن الظن في سلامي
بدل عتابي و ملامي
نقفل ع الشيطان باب العداوة
افتكر لحظة حلوة
عشناها سوا
وإفتكر مرة غنوة
سمعناها سوا
و نتنازل عن أي هفوة
و ننسي حبة القساوة
إنت و انا .. هناخد إيه
م الخصام حتي و الخناق ؟
ليه تساومني و اساومك
علي حقي و حقك و نتسابق ع الفراق
واللي يسمعني و يسمعك
يفتكر أننا في حلبة سباق
و الشيطان يدخل ما بينا
و يزيد خلافنا ضراوة
هيا دنيتنا إيه… غير يومين
يوم لقا و التاني فراق
يفيد بإيه تعذبني و أعذبك
بدل ما تعذرني و أعذرك
و تقدرني و أنا أقدرك
و يحل مكان الخصام أشواق
تزول من عنينا الغشاوة
و تزيد ما بينا الغلاوة .
بالهداوة يا صاحبي بالهداوة
لما تعاتبني و اعاتبك بالهداوة
★★★★★★★★★★★★★★★
د/عمر عبد الجواد عبد العزيز
